जळगाव: रोटरीच्या 'सेवन बाय सेवन बाय सेवन' ज्ञानसत्रातून विद्यार्थ्यांवर संस्काराचे बीज; अनुभूती स्कूलच्या निशा जैन यांचे प्रतिपादन

जळगाव (लोकमन न्यूज प्रतिनिधी: अनिल चौधरी, निंब) - विविध क्षेत्रांत यशस्वी असलेल्या रोटरी सदस्यांनी आपल्या ज्ञानाचा आणि अनुभवाचा उपयोग करून विद्यार्थ्यांची ज्ञानवृद्धी करण्याचे पवित्र कार्य केले आहे. मूल्यधारित शिक्षणातून विद्यार्थ्यांवर योग्य संस्कार होणे ही काळाची गरज असून, रोटरी क्लब जळगाव शैक्षणिक क्षेत्रात राबवत असलेले उपक्रम अत्यंत स्तुत्य आहेत, असे प्रतिपादन अनुभूती इंटरनॅशनल स्कूलच्या संचालिका निशा जैन यांनी केले. रोटरी क्लब जळगावच्या 'सेवन बाय सेवन बाय सेवन' या विद्यार्थ्यांसाठीच्या विशेष ज्ञानसत्र व्याख्यानमालेच्या समारोपप्रसंगी त्या बोलत होत्या. याप्रसंगी जिजामाता विद्यालयास मानाचा 'इंटरॅक्ट क्लब पुरस्कार' देऊन गौरविण्यात आले.

गणपती नगरातील रोटरी हॉलमध्ये हा समारोप सोहळा मोठ्या उत्साहात पार पडला. या कार्यक्रमाला प्रमुख अतिथी म्हणून रोटरी डिस्ट्रिक्ट गव्हर्नर (इलेक्ट) डॉ. राजेश पाटील उपस्थित होते. तसेच व्यासपीठावर सहाय्यक प्रांतपाल डॉ. अपर्णा भट-कासार, रोटरीचे अध्यक्ष गिरीश कुलकर्णी, संवाद सचिव पंकज व्यवहारे, आणि प्रकल्प प्रमुख सुबोध सराफ यांची प्रमुख उपस्थिती होती.

ज्ञानगंगेचा विस्तार आणि उपक्रमाची राज्यव्यापी अंमलबजावणी

आपल्या मार्गदर्शनात निशा जैन यांनी रोटरीच्या या अभिनव उपक्रमाचे तोंडभरून कौतुक केले व पुढील वर्षी हा उपक्रम शहरातील जास्तीत जास्त शाळांमध्ये राबवावा अशी अपेक्षा व्यक्त केली. यावेळी डॉ. राजेश पाटील यांनीही या उपक्रमाची स्तुती करत, रोटरी क्लब जळगावचे यावर्षीचे काही प्रमुख उपक्रम आगामी वर्षात संपूर्ण रोटरी डिस्ट्रिक्टमध्ये राबविण्याचा आपला मानस व्यक्त केला. यामुळे जळगावच्या या उपक्रमाला राज्यव्यापी महत्त्व प्राप्त होणार आहे.

अठरा वर्षांची ज्ञानसेवा: १४ शाळा, १४ वक्ते, ८८ व्याख्यानांचा देदीप्यमान प्रवास

प्रास्ताविकात प्रकल्प प्रमुख सुबोध सराफ यांनी या ज्ञानसत्राच्या प्रवासाची माहिती दिली. गेल्या १८ वर्षांपासून क्लबतर्फे शहरातील विविध शाळांमध्ये विद्यार्थ्यांसाठी ही ज्ञानसत्र व्याख्यानमाला अविरतपणे राबविण्यात येत आहे. गेल्या तीन वर्षांपासून ते स्वतः प्रकल्प प्रमुख म्हणून कार्य पाहत आहेत. यावर्षी या प्रकल्पांतर्गत शहरातील १४ शाळांमध्ये १४ तज्ज्ञ वक्त्यांनी विविध विषयांवर एकूण ८८ व्याख्यानांद्वारे विद्यार्थ्यांना अमूल्य मार्गदर्शन केले.

ज्ञानयज्ञात बहुमोल योगदान देणाऱ्या १४ तज्ज्ञ वक्त्यांचा सन्मान

या ज्ञानयज्ञात आपले बहुमूल्य योगदान देणाऱ्या सर्व १४ वक्त्यांचा यावेळी मान्यवरांच्या हस्ते सन्मानचिन्ह देऊन विशेष गौरव करण्यात आला. सन्मानित वक्त्यांमध्ये कवरलाल संघवी, डॉ. शमा सुबोध, स्वाती ढाके, पंकज व्यवहारे, डॉ. शुभदा कुलकर्णी, डॉ. पराग जहागीरदार, डॉ. पवन बजाज, राजेश वेद, ॲड. महेश भोकरीकर, ॲड. आनंद मुजुमदार, गिरीश कुलकर्णी, ॲड. सागर चित्रे, डॉ. रवी हिरणी आणि डॉ. सतीश शिंदाडकर यांचा समावेश होता.

याप्रसंगी व्याख्यानमालेतील वक्त्यांच्या वतीने डॉ. पराग जहागीरदार व राजेश वेद यांनी आपले अनुभव कथन केले. तसेच मुख्याध्यापकांच्या वतीने सरोज तिवारी यांनी, तर शिक्षकांच्या वतीने संजय खैरनार यांनी मनोगत व्यक्त केले.

या दिमाखदार सोहळ्याचे सुरेख सूत्रसंचालन आदिती कुलकर्णी यांनी केले, तर उपस्थितांचे आभार पंकज व्यवहारे यांनी मानले. कार्यक्रमाची सांगता राष्ट्रगीताने करण्यात आली. शैक्षणिक क्षेत्रातील रोटरीच्या या योगदानाचे जळगाव शहरात सर्वत्र कौतुक होत आहे.

शब्दांकन-किशोर पाटील सर जळगाव