केंद्राची ज्येष्ठांना मोठी भेट! ७० पार केलेल्या प्रत्येकाला 'वय वंदना' योजनेंतर्गत हक्काचे आरोग्य संरक्षण

नवी दिल्ली: वाढत्या वयासोबत उद्भवणाऱ्या आरोग्यविषयक समस्या आणि उपचारांचा वाढता खर्च ही ज्येष्ठ नागरिकांसाठी नेहमीच एक मोठी चिंतेची बाब असते. हीच बाब लक्षात घेऊन केंद्र सरकारने आता 'आयुष्मान भारत' योजनेअंतर्गत ७० वर्षांवरील सर्व ज्येष्ठांसाठी 'वय वंदना' ही विशेष योजना सुरू केली आहे. या योजनेमुळे आता उत्पन्नाची कोणतीही अट न ठेवता सत्तरी पार केलेल्या प्रत्येक ज्येष्ठाला हक्काचे आणि मोफत आरोग्य संरक्षण मिळणार आहे.

आरोग्य विभागाने दिलेल्या माहितीनुसार, आतापर्यंत ९ हजार ५६५ 'वय वंदना' कार्ड तयार झाले आहेत. ही योजना अत्यंत फायदेशीर असल्याने उर्वरित पात्र ज्येष्ठांनीही तत्परता दाखवत आपले कार्ड काढून घ्यावे, असे आवाहन आरोग्य विभागाने केले आहे.

घरबसल्या असे बनवा 'वय वंदना' कार्ड

ज्येष्ठ नागरिकांना किंवा त्यांच्या नातेवाईकांना घरबसल्या मोबाईलवरून हे कार्ड काढता येईल. याची सोपी प्रक्रिया खालीलप्रमाणे:

आयुष्मान आणि वय वंदना कार्डात नेमका फरक काय?

या दोन्ही योजना आरोग्य संरक्षणाशी संबंधित असल्या तरी त्यातील पात्रतेचे निकष आणि फायदे थोडे वेगळे आहेत:

• सामान्य आयुष्मान कार्ड: हे कार्ड सामाजिक-आर्थिक जात जनगणनेच्या पात्रतेनुसार दिले जाते, ज्यामध्ये एका कुटुंबाला वार्षिक ५ लाखांपर्यंतच्या उपचारांची सुविधा मिळते.
• वय वंदना कार्ड: हे कार्ड केवळ ७० वर्षांवरील व्यक्तींसाठीच आहे. जर एकाच कुटुंबात दोन ज्येष्ठ नागरिक असतील, तर दोघांनाही स्वतंत्र किंवा संयुक्त कार्ड मिळू शकते. सर्वांत महत्त्वाचे म्हणजे, हे कार्ड कुटुंबाच्या ५ लाखांच्या मर्यादेव्यतिरिक्त अतिरिक्त आरोग्य संरक्षण देते.

पूर्णपणे कॅशलेस व पेपरलेस प्रक्रिया

या योजनेअंतर्गत रुग्णालयात भरती होताना रुग्णाला स्वतःच्या खिशातून एकही रुपया द्यावा लागत नाही. सर्व प्रक्रिया ऑनलाइन पोर्टलद्वारे पार पडते. केवळ 'वय वंदना' कार्ड आणि आधार कार्ड दाखविल्यानंतर रुग्णालयाकडून उपचाराची प्रक्रिया सुरू केली जाते. त्यामुळे डिस्चार्जच्या वेळीही कागदपत्रांचा किंवा पैशांचा कोणताही त्रास होत नाही.

कोणत्या आजारांवर मिळणार उपचार?

या कार्डाद्वारे अनेक गंभीर आजारांवर मोफत उपचार केले जातात. यात प्रामुख्याने हृदयाच्या शस्त्रक्रिया (बायपास, अँजिओप्लास्टी), गुडघे व सांधे प्रत्यारोपण, कर्करोग, किडनीचे विकार, मोतीबिंदू आणि मज्जासंस्थेशी (न्यूरो) संबंधित गंभीर आजारांचा समावेश आहे.

सरकारीसह खासगी रुग्णालयांतही लाभ

सदर योजनेचा लाभ केवळ सरकारी रुग्णालयांपुरता मर्यादित नाही, तर योजनेत समाविष्ट असलेल्या अनेक खासगी रुग्णालयांमध्येही घेता येतो. जिल्ह्यासह राज्यातील अनेक नामांकित मल्टिस्पेशालिटी हॉस्पिटल्समध्ये ही सुविधा उपलब्ध आहे.

७० वर्षांवरील प्रत्येक ज्येष्ठ नागरिक या योजनेसाठी पात्र आहे, मग त्यांचे उत्पन्न कितीही असो किंवा ते पेन्शनधारक असोत. आपत्कालीन स्थितीत तब्बल १० लाखांपर्यंतच्या मोफत उपचारांचा लाभ घेण्यासाठी प्रत्येक ज्येष्ठ नागरिकाने आपले 'वय वंदना' कार्ड त्वरित काढून घ्यावे, असे आवाहन प्रशासनाकडून करण्यात आले आहे.