शिवसेना जनसंपर्क कार्यालय हे सर्वसामान्यांचे 'न्यायालय' - पालकमंत्री गुलाबराव पाटील

(अमळनेर पारोळा प्रतिनिधी :- पंकज पाटील) नशिराबाद (दि. ११ एप्रिल २०२६): शिवसेना ही केवळ एक राजकीय संघटना नसून, ती जनतेच्या सुख-दुःखाशी जोडलेली एक जिवंत चळवळ आहे, असे प्रतिपादन राज्याचे पाणीपुरवठा व स्वच्छता मंत्री तथा पालकमंत्री गुलाबराव पाटील यांनी येथे केले. उपनगराध्यक्ष पंकज महाजन यांच्या पुढाकाराने नशिराबाद येथे उभारण्यात आलेल्या शिवसेना जनसंपर्क कार्यालयाच्या उद्घाटनाप्रसंगी ते बोलत होते. हे कार्यालय सर्वसामान्यांचे 'न्यायालय' बनले पाहिजे, असेही त्यांनी अधोरेखित केले.

नशिराबाद येथे शिवसेना जनसंपर्क कार्यालयाचे उद्घाटन, महिला आघाडीची स्थापना आणि गुणवंतांच्या सत्कार सोहळ्यात ते प्रमुख पाहुणे म्हणून बोलत होते. कार्यक्रमाच्या अध्यक्षस्थानी ज्येष्ठ पदाधिकारी डिगंबर रोटे होते.

कार्यालयाचे उत्साहात लोकार्पण आणि महिला आघाडीची स्थापना

नशिराबाद येथील विठ्ठल मंदिरासमोरील परिसरात अत्यंत उत्साही वातावरणात या जनसंपर्क कार्यालयाचे लोकार्पण करण्यात आले. उपनगराध्यक्ष पंकज महाजन यांनी आपली पत्नी व माजी जिल्हा परिषद सदस्या लीना महाजन यांच्या वाढदिवसाचे औचित्य साधून हे कार्यालय जनतेसाठी खुले केले. याप्रसंगी नशिराबाद शहर शिवसेना महिला आघाडीची घोषणा करण्यात आली, ज्यामुळे संघटनेला अधिक बळकटी मिळणार आहे.

पालकमंत्र्यांचा भव्य नागरी सत्कार आणि गुणवंतांचा गौरव

या महत्त्वपूर्ण सोहळ्यात नशिराबाद नगरपालिकेच्या वतीने तसेच लेवा समाजाच्या वतीने पालकमंत्री गुलाबराव पाटील यांचा भव्य नागरी सत्कार करण्यात आला. शहरातील सामाजिक सभागृहांसाठी मोठ्या प्रमाणात निधी उपलब्ध करून दिल्याबद्दल त्यांना सन्मानपत्र देऊन गौरविण्यात आले. पालकमंत्र्यांच्या हस्ते यावेळी विविध क्षेत्रांत आपल्या कार्याचा ठसा उमटवणाऱ्या मान्यवरांचा गौरव करण्यात आला.

प्रमुख मान्यवरांची उपस्थिती

या सोहळ्याला जिल्हाप्रमुख विष्णू भंगाळे, नगराध्यक्ष योगेश पाटील, उपनगराध्यक्ष पंकज महाजन, माजी उपाध्यक्ष लालचंद पाटील, उपजिल्हा प्रमुख अनिल भोळे, तालुका प्रमुख शिवराज पाटील यांच्यासह शिवसेना व युवासेनेचे असंख्य पदाधिकारी आणि मोठ्या संख्येने नागरिक उपस्थित होते.