निसर्गाचा कोप, बळीराजा ढसाढसा रडला! निंब गावात रब्बी पिकांचे अतोनात नुकसान.

अमळनेर: निसर्गाच्या लहरीपणामुळे अमळनेर तालुक्यातील निंब आणि परिसरात वादळी पावसाने अक्षरशः कहर केला आहे. या अस्मानी संकटामुळे गावातील शेतकऱ्यांचे अतोनात नुकसान झाले असून, डोळ्यांदेखत उभ्या पिकांची नासाडी होताना पाहून बेबस बळीराजाला अश्रू अनावर झाले आहेत.

हातातोंडाशी आलेला घास हिरावला

गेल्या काही दिवसांपासून बदललेल्या हवामानाचा मोठा फटका निंब परिसराला बसला आहे. शेतकऱ्यांनी रात्रंदिवस एक करून पोटच्या गोळ्यासारखी वाढवलेली पिके आता काढणीला आली होती. मात्र, अचानक आलेल्या वादळी पावसाने हातातोंडाशी आलेला घास एका क्षणात हिरावून घेतला. आपल्या डोळ्यांसमोर कष्टाची माती होताना पाहतानाचे दुःख काय असते, हे केवळ एका शेतकऱ्यालाच समजू शकते.

"देवाने आम्हास एकदाचे मारून तरी टाकावे..." - काळजाला भिडणारी शेतकऱ्यांची व्यथा

अस्मानी संकटाने शेतकरी पूर्णपणे हवालदिल झाला आहे. पिकांचे झालेले अतोनात नुकसान पाहून काही शेतकरी बांधवांना अक्षरशः रडू कोसळले. "निसर्गाच्या या लहरीपणात रोज रोज असे मरण यातनांचे दुःख भोगण्यापेक्षा, देवाने आम्हाला एकदाचे मारून तरी टाकावे," अशी अत्यंत हृदयद्रावक आणि उद्विग्न प्रतिक्रिया काही हतबल शेतकऱ्यांकडून व्यक्त केली जात आहे.

रब्बी पिकांसह फळबागा भुईसपाट, वर्षभराच्या मेहनतीवर पाणी

या वादळी पावसामुळे केळी आणि पपईच्या बागांचे अतोनात नुकसान झाले असून झाडे उन्मळून पडली आहेत. याशिवाय रब्बी हंगामातील ज्वारी, बाजरी आणि गहू यांसारख्या पिकांचेही मोठे नुकसान झाले आहे. पिके आडवी झाल्याने शेतकऱ्यांच्या वर्षभराच्या मेहनतीवर आणि उत्पन्नावर पाणी फिरले आहे. अगोदरच आर्थिक विवंचनेत असलेला शेतकरी या नव्या संकटामुळे पुरता कोलमडून पडला आहे.

शासनाने तत्काळ दखल घेण्याची मागणी, बळीराजा मदतीच्या प्रतीक्षेत

एकीकडे अस्मानी संकट तर दुसरीकडे आर्थिक विवंचना अशा दुहेरी कोंडीत सापडलेल्या बळीराजाला आता शासनाकडूनच मदतीची अपेक्षा आहे. शासन दरबारी या गंभीर परिस्थितीची तत्काळ दखल घेतली जावी; तसेच अमळनेर तालुक्यात, जळगाव जिल्ह्यात व गावागावांमध्ये झालेल्या या शेतीच्या नुकसानीचे प्रशासनाने तातडीने पंचनामे करावेत आणि नुकसानग्रस्त शेतकऱ्यांना भरीव आर्थिक मदत द्यावी, अशी तीव्र भावना आणि मागणी निंबसह परिसरातील शेतकरी वर्गातून उमटत आहे.

(वृत्त संकलन: अनिल चौधरी, निंब)