संघर्षातून स्वाभिमानाकडे : सरला ताई परदेशी यांची प्रेरणादायी वाटचाल..

जळगाव : परिस्थिती कितीही कठीण असली, तरी मनात जिद्द आणि कष्टाची तयारी असेल तर यशाला गवसणी घालता येते, हे जळगावच्या सरला ताई परदेशी यांनी सिद्ध करून दाखवले आहे. शहरातील आदर्श नगर आणि गणपती नगर परिसरात आज जेव्हा सरला ताई आपली ई-रिक्षा घेऊन भाजीपाला विकायला निघतात, तेव्हा त्यांच्याकडे पाहणाऱ्या प्रत्येकाच्या डोळ्यांत कौतुकाची थाप असते.

पूर्वी सरला ताईंना आपला उदरनिर्वाह करण्यासाठी प्रचंड शारीरिक कष्ट उपसावे लागत होते. भर उन्हात किंवा पावसाची तमा न बाळगता लोटगाडी ढकलत गल्लोगल्ली भाजी विकणे हा त्यांच्या दिनक्रमाचा भाग होता. मात्र, वाढते वय आणि शारीरिक मर्यादांच्या पुढे न झुकता त्यांनी आपला स्वाभिमान जपला. त्यांच्या याच धडपडीची दखल मराठी प्रतिष्ठानने घेतली आणि त्यांच्या आयुष्याला एक नवे वळण मिळाले.

मराठी प्रतिष्ठानचा 'भरभक्कम' आधार

महिला सबलीकरणाचा केवळ नारा न देता, मराठी प्रतिष्ठानने प्रत्यक्ष कृतीवर भर दिला. सरला ताईंना व्यावसायिक स्तरावर सक्षम करण्यासाठी प्रतिष्ठानने पुढाकार घेऊन त्यांना ई-रिक्षा (ई-कार्ट) उपलब्ध करून दिली. ही प्रक्रिया केवळ गाडी देण्यापुरती मर्यादित नव्हती; तर राष्ट्रीयकृत बँकेतून कर्जाची मंजुरी, शासकीय सबसिडीचे कायदेशीर सोपस्कार आणि आरटीओ कडून आवश्यक असणारा चालक परवाना (License) मिळवून देण्यापर्यंत सर्व सहकार्य करण्यात आले.

जळगावच्या पहिल्या महिला ई-रिक्षा भाजी विक्रेता

आज सरला ताईंच्या कामाचे स्वरूप पूर्णपणे बदलले आहे. पहाटेच्या अंधारात उठून त्या थेट मुख्य बाजारपेठेत जातात. ताज्या भाजीपाल्याची निवड करताना त्यांच्या चेहऱ्यावर एक वेगळाच आत्मविश्वास जाणवतो. जळगाव शहरात ई-रिक्षा चालवून भाजी विक्री करणाऱ्या त्या पहिल्या महिला ठरल्या आहेत. त्यांच्या कामातील नियमितता आणि ग्राहकांशी असणारे आपुलकीचे नाते यामुळे त्यांचा व्यवसाय आता नव्या उंचीवर पोहोचला आहे.

सरला ताईंचा हा प्रवास केवळ एका महिलेची प्रगती नसून, समाजातील प्रत्येक कष्टकरी महिलेसाठी ती एक प्रेरणा आहे. "संधी आणि योग्य पाठबळ मिळाले, तर स्त्रिया आभाळाला गवसणी घालू शकतात," हेच या उपक्रमातून अधोरेखित होते. त्यांच्या या जिद्दीला 'लोकमन न्यूज'चा सलाम!