कोवळ्या जिवांची 'अग्निपरीक्षा'! कडाक्याच्या उन्हात वार्षिक परीक्षांचे नियोजन,पालकांचा संतप्त सवाल!

नागोठणे ( शामकांत नेरपगार ) : महाराष्ट्रात सध्या उन्हाचा पारा चाळीशी पार करत असताना, महाराष्ट्र राज्य शैक्षणिक संशोधन व प्रशिक्षण परिषदेने (SCERT) इयत्ता पहिली ते अकरावीच्या वार्षिक परीक्षांचे नियोजन केले आहे. ११ एप्रिलपासून सुरू झालेल्या या परीक्षा २२ एप्रिलपर्यंत चालणार आहेत, ज्यामुळे विद्यार्थी आणि पालकांचे प्रचंड हाल होत आहेत. लोकमन न्यूज अनिल चौधरी (निंब, अमळनेर) यांच्या वृत्तानुसार, वाढत्या उन्हामुळे विद्यार्थ्यांच्या आरोग्याचा प्रश्न ऐरणीवर आला आहे.

सकाळच्या सत्रात काही पेपर सकाळी ८ ते ११ या वेळेत असले, तरी अनेक परीक्षा दुपारी १ वाजेपर्यंत चालत आहेत. कडाक्याच्या उन्हामुळे विद्यार्थ्यांना परीक्षेला पोहोचताना प्रचंड त्रास सहन करावा लागत आहे. विशेषतः ग्रामीण भागातील जे विद्यार्थी सायकलवरून किंवा पायपीट करत परीक्षा केंद्रांवर पोहोचतात, त्यांच्या आरोग्यावर याचा गंभीर परिणाम होत आहे. डोकेदुखी, चक्कर येणे, निर्जलीकरण अशा समस्यांना सामोरे जावे लागत असल्याचे पालक सांगत आहेत.

प्रशासनाचा दुहेरी मापदंड: पालकांचा संतप्त सवाल

एकिकडे प्रशासन नागरिकांना उन्हाळ्यात दुपारी घराबाहेर न पडण्याचे, स्वतःची आणि मुलांची काळजी घेण्याचे आवाहन करत आहे, तर दुसरीकडे शिक्षण विभाग मात्र भर दुपारी विद्यार्थ्यांच्या परीक्षा घेत आहे. प्रशासनाच्या या दुहेरी मापदंडामुळे पालकांचा संताप अनावर झाला आहे. त्यांनी थेट 'सरकारचे डोके ठिकाणावर आहे का?' असा संतप्त सवाल विचारला आहे. विद्यार्थ्यांच्या आरोग्यापेक्षा परीक्षांचे वेळापत्रक महत्त्वाचे आहे का, असा प्रश्न पालक विचारत आहेत.

या गंभीर परिस्थितीवर तातडीने लक्ष देऊन विद्यार्थ्यांच्या आरोग्याचा विचार करावा, अशी मागणी पालकांकडून केली जात आहे. परीक्षेच्या वेळापत्रकात त्वरित बदल करून, दुपारी होणाऱ्या परीक्षा सकाळच्या सत्रात घेण्यात याव्यात किंवा परीक्षांच्या वेळेत योग्य तो बदल करावा, जेणेकरून विद्यार्थ्यांना उन्हाचा त्रास होणार नाही, अशी त्यांची मागणी आहे. या मागणीकडे शिक्षण विभाग आणि शासनाने गांभीर्याने पाहण्याची गरज आहे.